4, అక్టోబర్ 2018, గురువారం

శ్రీశ్రీ వర్థంతి సందర్భంగా నివాళి



తరం తరం నిరంతరం
తెలుగుజాతికి నీవోక వరం
మాతరం, మనిషైన ప్రతీ ఒక్కరం
నీ కవితల కవనాల్లో 
ఆ నిట్టూర్పుల జ్వాలల్లో 
ఎగదోసే చైతన్యంలో
ఎరుక చెప్పే మాటల్లో
చిక్కిన వాళ్లమే
అక్షరం దిద్దిన ప్రతీ ఒక్కరం
అదే ఆయుదంగా మహాప్రస్థానాన్ని సాగించిన వాళ్లమే
మరో కొంపల్లి జనార్ధనరావుగా మారిన వాళ్లమే
చలం చూపిన దారిలో శ్రీరంగం దిద్దిన వాళ్లమే, శ్రీకారం చుట్టిన వాళ్లమే
అసలు మా అస్థిత్వానికి కారణం నువ్వు
గ్రాందిక భూగర్బాన్ని చీల్చి 
నుడికారాలని అర్తనాదాలు పెట్టించి
తెలుగుకి స్వేచ్చా వాయువుల్ని అందించింది నువ్వు
ఊహల్లో ఊరేగుతున్న నవయువకులని
భూమార్గం పట్టించింది నువ్వు
భూకంపం పుట్టించింది నువ్వు
భూనబోంతరాలు దద్దరిల్లేలా సింహనాదం చేసింది నువ్వు
చరిత్రలో కూలీలకి తావిచ్చింది నువ్వు
తడారిపోయిన మా గొంతుకలకి హలాహలంతో శబ్దాన్నందించింది నువ్వు
పురిటినొప్పుల తెలుంగుకి తెగువనందించింది నువ్వు
మహాకవీ మా మనసులో యశస్సులో
ఉషోదయంలా వెలిగొచ్చేది నువ్వు
మరో ప్రపంచాన్ని దాని ప్రళయఘోషని చూపించింది నువ్వు
నిస్సత్తువ ఆవహించిన మా నరాల్లో ఉడుకునెత్తురిని ఉరకలెత్తించింది నువ్వు
అందుకే 
ఈ శతాభ్దం నీది
కాదు కాదు 
తెలుగు బాష ఆద్యంతం నీది
మర మనుషుల జాడలు కదలాడుతున్న వేళ
స్వార్థాల సొంతాలు మితిమీరుతున్న నేల
నీదీ నాది కులం గోత్రం
పైశాచికంగా మారి ప్రహాసనం నడుపుతుంటే
పక్కనోడిని పట్టించుకోని
ప్రజా జీవితం పరిభ్రమిస్తుంటే
కాలకేళిలో రాజకీయం
కరుకు రెక్కల్ని విస్తరిస్తుంటే
బిక్కటిల్లి దిక్కుతోచక 
అన్యాయ పరిష్వంగనలో పీడితులు తాడీతులు చిక్కుకుపోతుంటే
పరాన్నజీవుల, జలగల 
విక్రుత క్రీడలు 
పామర జన సందోహంలో
పడమటి నీడలు
నేటి ఆవరణం ఇది
రణాన దూకాల్సిన రంగస్థలం ఇది
అందుకే ఇక్కడ నిలబడి నిన్ను ఆవాహనం చేస్తున్న
నువు కావాలి నువ్వే కావాలి
శ్రీ శ్రీ తిరిగిరా
మళ్లీరా
కొరడాతో మెద్దుబారిన మా చర్మాన్ని చీల్చేయ్
కలంతో కునారిల్లిన మా అంతరంగాన్ని కడిగెయ్
నిప్పులు చిమ్ముతూ 
ఘణఘణ మోగుతూ
నీ ఆగమనం సమస్త కోటికి ఆనందం.

కామెంట్‌లు లేవు:

కామెంట్‌ను పోస్ట్ చేయండి